Siren bajate huye ambulance aspatal ke ander dakhil hone ke saath hi dusari taraf se wardboy stretcher daudker lata hai, Laate ke saath hi ambulance mein se Madhulika mariz ko niche utarati hai, jo ki khoon se lathpath tha.

Dr. daudker aate hi – “Jaldi se aap form bhariye”  – Madhulika ki taraf ishara karate huye.

Aur dusari taraf- “Ise jaldi se operation theatre mai le chaliye” – Junior Doctor se bolte huye.

(Idhar form bharker Madhulika operation theatre ke bahar bench per baithne ke saath hi uske ghutne mai bahut tej dard udhata hai, Jaise hi ghutne per haath lagati hai, ye kya? Salwar ka ek hissa ghutne ke pass se gayab tha. Aur ghutne per se khoon nikal raha tha. Oh….lagta hai salwar sadak per girne se phat gai hogi. Us samay to chot halki-phulki lag rahi thi parantu ab dard badhta hi ja raha hai. Jara mai bhi Dr. se apne ghutne ko dikha deti hu kahi haddi per jyada chot n aa gai ho. Kintu jau kaise? Abhi to….Mann hi mann santosh karte huye.

Uffff.. Vo dono ladke kitni teji se apni-apni bike ghuma-ghuma ker nikal rahe the, jab vo ghuma ker kisi cyclesawar ya scooter, gaari ke pass se nikalte to bahut tej shor machate huye nikalte jiske karan kai log gali dete huye pass dete ya phir ghabraker gir jate. Tabhi to main ghabra ker gir gai thi aur mere girte hi vo log itani zor-zor se hanste huye nikal gaye the, mano unhe dusaro ko girane v darane mein bada maza aa raha ho.

Jab mai giri tab mujhe bhi bahut gussa aaya tha. Un ladko ko jibharker mann hi mann gali di:

Kutte..Kamine.. Apne baap ki kamai per itarate ho.. Saale baap ki sadak samajh rakhe ho, kehte huye apni scooter uthai aur aage badh gai. Abhi thoda aage badhi hi thi, ki ek andhe mod ((vo mod jahan dono taraf ka rasta saaf dikhai nahi deta.)) per bahut bheed lagi thi. Kuchh log dono taraf ke traffic ko rok rahe the. Saaf samajh mein aa raha tha ki koi n koi accident hua hai. Vaise aashchry ki baat bhi nahi thi kyoki is jagah per roz-ki-roz ek-do accident hota hi tha. Ye sadak ek tarah se khooni sadak kahlati thi. Jab tak kisi ka khoon n bahade,Tab tak is sadak ko chain nahi.

Bheed ke karan mujhe bhi rukna pada. Utsuktavash main bhi aage badhker dekhane chali gai. Per ye kya? Ye to wahi ladka hai jo abhi-abhi mujhe giraker aaya tha. Parantu iska dusra saathi? Idhar-udhar gardan khuma ker dekhi, Kintu kahi bhi uska dusara saathi nahi dikha.)

Mann hi mann gusse mein – “Jaisi karani..waisi Bharni” Badbarate huye bheed se vapas nikalne lagi, tabhi dekhti kya hu. Ek ped ke chhaotale sharir per jahan-tahan khoon ris rahi jagah ko dono haatho se saaf ker raha tha. Usi waqt uski v meri nazar ek-dusare se jyu hi mili tyu hi apni nazar ko niche ker leta hai, mano apne kiye per pachhatave ke saath-saath mafi mang raha ho. Uski aisi halat dekhker ander hi ander mere ko ek ajeeb sa sakun ho raha tha.

Apne mann mein santosh liye jaise hi aage badne ke liye kadam badhai hi thi ki sahsa bheed mein se koi ek dusre ko keh raha tha – “Isko aspatal le jao nahi to ye mar jayega” -Pehle ne kaha.

“Tum hi kyu nahi le jate” – Dusare ne kaha.

“Nahi bhai.. ulta hum hi fas jayege”.

(Isi tarah kisi ne samay n hone ka bahana banaya to kisi ne paisa n hone ka, kisi ne police se tang hone ka. Yu hi bas log ek dusare per dhalte huye dhire-dhire waha se ghisakte ja rahe the. Mai jadwat waha khadi chupchap ye sab dekhate huye soch rahi thi ki aaj logo ke ander se insaniyat kaha chali gai. Kya yahi aadhunikta hai? Lagta hai is aadhunikta ka anusaran karte-karte log khud hi ki pehchan bhool se gaye hain. Aadhunikta ke naam per log machine ki chader odhker baithe hain. Kya yahi hamari sanskriti reh gai hai? Jiske ander n to insan hai aur n hi insaniyat. Phir kha-mo-kha hi unse umeed lagaye baithe hai. Ye sochte-sochte jhat se ek khali ambulance udhar se jate huye dekhker rukne ka ishara kiya aur usse zamin per lathpath khoon se sane vyakti ki taraf ishara kerte huye uski zindagi ke liye madad mangi. Vo thode manuhar ke baad taiyar ho gaya. Uske dusare saathi v logo ki madad se use ambulance mein letate hai.

“Mariz se aapka sambandh kya hai?” – Sahsa dusari taraf se aawaz aai. Ekaek yaado se nikalker kaha – “Kuchh nahi”.

“Matlab…” – Dr. ne aashchry se, “bina matlab ke aapka mariz ke saath itani sahanbhuti” -Dr. ne phir kaha.

“Jab logo mein insaniyat ki kami dekhi to kam-se-kam mai apni insaniyat ko aadhunikta ki bhet nahi chadhana chahati thi.” – Madhulika kahte-kahte Dr. ko sari ghatna ki vistrit jankari deti hai.”

“Ohhhh.. kya uske dusare saathi ne uske gharwalo ko jankari di?” – Dr. ne kaha.

“Pata nahi.. aur uska saathi bhi kahi dikh nahi raha” – Madhulika ek thandi sans chhodhate huye, “Dr.mariz ki tabiyat kaisi hai?”

“Sare sharir mein kanch-hi-kanch ghus gaye the, jinhe nikal diya gaya hai, Kintu khoon bahut bah jane se kuchh kaha nahi ja sakta parntu aapse chhupaunga nahi..” Thoda rukte huye – “Inke gharwalo ko jitani jaldi ho sake bula lijiye shayad uske pass samay bahut kam hai” – Dr. kehte huye sar jhukaker waha se chala jata hai.

“HEY BHAGWAN.. Iske gharwalo ka kaise pata lagau pata nahi iska dusara saathi kaha chala gaya? Jab uske gharwale aayenge to main kaise bataungi ki ab uske ghar ka chiraag apni hi galti se bujhhane wala hai.” – (Madhulika soch hi rahi thi ki..)

“Doctor…mera baccha kaisa hai?” – Dusari taraf se aawaz aate hi Madhulika ne pichhe mudhkar dekha uske saathi ke saath-saath uske gharwale bhi aa gaye the.

(Madhulika ne rahat ki sans li ki kam-se-kam vo log apne bacche se aakhari samay mein mil to lenge.)

Itane mein hi darwaze se baahar Dr. aate huye- “Aap logo ne aane mai bahut der ker di. Ab aap log usse kabhi mil nahi payenge.”

Sahsa unsab se mukhatib hoker Madhulika bol padi- “Aaplogo ko malum hai aap ka beta apne se nahi mara balki uski hatya hui hai.”

“Kyaaa.. isne (saathi ki taraf ishara karte huye) to kaha tha ki accident hua hai.” -Sabhi ek saath uchhal pade.

“Nahi.. Accident nahi tha.. Maine kaha n.. Uski hatya hui hai, meri aakho ke samne.” Madhulika ne kaha.

“Kisne ki.. mere bete ki hatya?” – rote huye.

“Aaplogo ne.. ” – Madhulika uske maa-baap ki taraf ishara karte huye.

“Haan…Haan.. Aaplogo ne kyoki aap ke paas paisa hai.. Rutba hai.. to kya? Iska matlab aap samay se pehle hi baccho ke haath mein bike ki chabhi thama denge, Aise mein baccho ki bin mange murade puri ho jati hai unhe to mano apne sapno ki udaan mil gai ho. Jo unhone sapne mein dekha hota hai, vo hakikat mein karna chahte hain. Phir kya hai? Haath mein bike ki chabhi aur unke saath unke sapno ki udaan.. Jo hakikat se hai anjaan. Aise mein jin baccho ka samay se pehle hi suraj ast ho jaye uska jimmedaar kaun hai? Aap…Kewal aap..Kewal aap.” – kehte-kehte Madhulika dhire-dhire bhaari kadmo ke saath aspatal parisar se baahar nikal jati hai.

Note to Parents– Har mata-pita se yahi kehna chahungi ki apne baccho ko sabhi kuchh dilaiye, kintu samay aane per. Aur unhe samay-samay per achhe- bure ka gyan bhi de. Jisse baccho ke ander samay rehte hi sahi gyaan ka sanchar ho. Kadapi baccho ke aage apne rutbe.. paise.. shanoshaukat ki bakhaan n kare. Unhe ek achha insan banane ki koshish kare taki unke ander kam-se-kam insaniyat to ho.

Note to Teenagers– Kya baccho ki sach mein galti nahi hoti? Aisa nahi hai, aaplog (Bacche) apne mata-pita se jyada kasurwar ho kyoki unhone to aap pe bharosa kiya aur aap unke bharose ka kya kerte ho ye aap per nirbhar hai. Aur saath hi aap se yahi kehna hai, ki kabhi apne dosto ki dekha dekhi n kare. Agar aapka dost mahengi.. badhiya sports bike kharid raha hai to ye jaruri nahi hai ki aap bhi kharide. Ho sakta hai ki aap us bike ko chalane mein asamarth ho. Aur n hi apne dosto ki galat harkato ka saath de chahe bike tej chalane ka ho ya kisi ko tang karne ka. Har haal mein galat harkato ka anjam hamesha galat hi hota hai. Isliye zindagi mein hamesha ache karam karo taki maa-baap ka sar garv se ucha ho.

Add to favorites